咩話...有冇睇錯，8月6號生日嘅錢嘉樂收到樂悠卡！冇睇錯，今年係嘉樂踏入60歲嘅大日子，雖然佢點睇都唔似「登六」，圈中人緣甚佳嘅嘉樂，喺咁開心嘅日子，一班老友又點會錯過慶祝嘅機會，太太湯盈盈同兩個女，聯同獎門人曾志偉、「七魔女」成員佘詩曼、文頌嫻、鍾麗淇、梁靖琪、姚樂怡及麥美恩同林秀怡等到賀。
大家悉心準備咗一個巨型嘅樂悠卡造型蛋糕，卡中仲有嘉樂嘅相，旁邊有長者八達通同壽包，真係非常窩心！一睇就知祝賀嘉樂夠歲數坐兩蚊車，不過嘉樂見到眼前蛋糕嚇一嚇，可能冇諗過做得咁逼真。
一班老友聚首，當然要玩得盡興，獎門人玩忌慶賀一賀壽星嘉樂，令現場一度變成好似拍緊「獎門人」節目咁混亂，唔少人迴避以免中Cream。在場嘅阿佘即刻Man姐上身直擊報道：「現場情況係非常嚴重，出面情況已經失控，有一位明明黃皮膚嘅人，塊臉變成綠色。」而負責拍攝同剪接片段嘅文頌嫻，就喺社交平台寫上「今次都係蛋糕出事，但搞事的人不是我，Sorry不能開名，怕得罪高層」。
到大合照前，太太盈盈悉心為老公執番靚個樣，再同兩位寶貝女及一眾老友合照，嚟到切蛋糕嘅重要時刻，盈盈當然好識做，好肉緊咁吻賀壽星，氹得嘉樂不知幾開心。
