影后張曼玉（Maggie）一向行蹤神秘，過住「神隱」生活，唔少影迷好掛住佢，更想知道佢嘅近況。60歲Maggie今日（8號）宣布加入內地一個自媒體平台，消息一出即刻衝上社交平台熱搜榜，引爆網友熱烈討論，大家好期待睇到Maggie分享更多唔同生活面貌。
Maggie擁有世界各地嘅影迷，喺分享Vlog嘅時候好貼心，附上中、英雙語翻譯，而佢喺第一條片嘅配文就寫：「生命是一座花園，來坐坐。在這片生命的花園裡，我們一起，一直在路上。無論道路平坦還是崎嶇，我們一起來分享一下旅途上的風景吧。」充滿溫馨感，好似一位好耐冇見嘅老朋友同大家傾偈咁。
至於Maggie第一條Vlog充滿濃濃生活感！從片中可見Maggie度假時嘅悠閒感，特別係佢品嚐美食時嘅滿足心情、行街散步時開心大笑，真係隔個Mon都可以感受到佢想分享嘅快樂心情同生活魅力！
