戀愛真人騷《女神配對計劃》每集發展都睇得觀眾非常肉緊！梁敏巧（Maggie）同劉啟進（Matt）嘅互動甜度十足。睇吓佢哋兩個玩呢個隔住啤牌錫錫嘅遊戲，雖然好似怕怕羞羞，但笑得非常開心。唔只喺側邊食花生嘅關嘉敏忍唔住推波助瀾，就連其他女神同參賽者都當咗佢哋係打卡景點，爭住要大合照打卡！
經過呢個臉紅心跳嘅遊戲後，Maggie同Matt被讚好有一對新人嘅感覺，Maggie笑指其他人太壞，當咗佢哋喺係景點，但阿Matt就話自己人生之中未試過咁興奮，完全遮掩唔住開心之情。
唔只Matt享盡艷福，林堡熙（Eddie）亦攞正牌貼近葉蒨文（Sophie）香肩，真係要為曾展望（GM）感到難受。不過，令GM難受嘅可能唔係睇住情敵同女神貼貼，而係佢要被Eddie咀！
節目即將有踢館者出現，一眾女神好期待，Sophie仲話要擔心嘅係一班參賽者先啱。當Eddie被問「擔唔擔心有參賽者隻眼細過你」時，佢即玩自嘲，引到全場大笑。