《2025香港小姐競選》14位候選佳麗繼早前到檳城拍攝外景，返港後佢哋就齊集電視城，跟莫文蔚（Karen）媽咪莫何敏儀學禮儀，莫Auntie喺過程中不時同佳麗互動，又考驗佳麗遇到唔同情況點應對，佢又即場解答佳麗們嘅疑問。
莫Auntie除咗傳授禮儀心得，又鼓勵大家要保持自信，仲分享自己同囡囡Karen相處點滴。同一班佳麗相處之後，莫Auntie大讚今屆佳麗質素好高，禮儀課堂都冇嘢難倒佢哋。
跟莫Auntie上堂後，佳麗們話獲益良多，6號朱文慧話中學時學過食飯禮儀，而今次莫Auntie就教咗好多日常生活會發生嘅情況。7號施宇琪喺英國時上過相關課程，但係莫Auntie教導點樣應付突發情況就相當有用。
2號甘詠寧覺得莫Auntie將禮儀形象化呈現出來，而1號李尹嫣見到莫Auntie嘅體態都提醒自己將來都要保持優雅身段。上堂後，5號曾閱遙話會注意日常飲食儀態，而11號梁倩萱覺得莫Auntie畀嘅飲食小貼士非常有用。
14位候選佳麗完成檳城拍攝，大家異口同聲話各方面都進步不少，特別係唔使瞓方面，4號莫凡學識咗喺唔夠瞓下仍然保持上鏡狀態，8號岳凡荻笑言已進化成唔使瞓覺嘅人。
9號陳詠詩覺得行程中做咗好多嘢，令佳麗們感情增進不少。唔夠一個月就比賽，3號蔡華英、10號文雅儀、12號庄靜璟、13號袁文靜同14號何詠多都希望廣東話及對答技巧更進步。