今屆香港小姐8月31號就會舉行決賽，而疫情最嚴重嘅當年冠軍 謝嘉怡 近年唔止醉心運動，更成為健康女性代名詞，參與多項同生活健康有關嘅生意，醫護人員出身嘅佢早前更參與多項少啲體力同意志力都唔掂嘅活動，決心同耐力一樣驚人，認真犀利。
話說轉眼Lisa已經成為港姐5年，月底就迎接「29＋1」嘅佢，日前就同同屆季軍 郭柏姸 仲有7月底踏入29歲嘅友誼小姐 鄺美璇 仲有佢嘅姐姐 鄺美淇，幾位靚女齊齊慶祝，又齊齊影貼紙相，展露平時幕前難見嘅率真一面。
Rosita當選後火速成為新一代演員，仲加入唔少重頭劇演出，好似《白色強人II》、《青春不要臉》、《美麗戰場》以及大受歡迎嘅《下流上車族》等，更以芊芊一角獲得飛躍進步女藝員獎，而熱播嘅《新聞女王》、《逆天奇案2》等劇Rosita都有參與，未播出嘅大堆重頭劇好似《金式森林》、《新聞女王2》仲有《夫妻的博奕》都一樣會見到佢嘅身影。
至於鄺美璇雖然卸任後未有專注演藝事業發展，不過就不時同早年亦曾參選港姐嘅家姐 鄺美淇 一齊於社交平台公開靚相，Maisie 2022年與圈外任職金融業嘅男友成婚，不時會夫妻拍拖外遊享受人生，去年更有傳佢已成為馬主。
