恭喜恭喜，準爸爸 方力申 星期五喺新加坡舉行嘅2025世界先進游泳錦標賽中，以2分16秒勇奪男子200米背泳嘅45-49歲組別冠軍。摘冠攞金牌一刻小方心情興奮，細佬更同行為佢紀錄精彩每分每秒，小方心情平伏後陸續出Post感謝支持佢嘅人，更特別表揚細佬為佢拍下一張，喺特區區旗前攞住金牌嘅開心時刻。而唔少圈中好友好似張繼聰、劉浩龍、關楚耀等都有出Po賀小方奪冠。
現年45歲嘅小方係前港隊游泳代表，有飛魚王子之稱，曾有9項香港紀錄在手，喺2000年悉尼奧運出戰200米背泳及400米個人四式，及後因踏足娛樂圈喺2004年正式退役。相隔15年後，小方喺2019年時為慈善機構籌款完成45公里環島泳後，重返泳池比賽。
2023年首次參加福岡舉辦嘅世界先進游泳錦標賽，出戰200米背泳以2分21秒得第六名；2024年喺多哈參與同一比賽以2分19秒得第二名，今次喺錦標賽中以2分16秒獲得冠軍，足證寶刀未老。
獲獎後小方喺社交平台發長文分享心聲，並以正能量鼓勵大眾，指自己今次游出2分16秒，相差世錦賽大會紀錄1秒多，亦比40-44歲組別的冠軍快少少，已經好滿意，目標達成。佢又重申如果唔係環島泳，絕對唔會再游返水，一度以為自己永遠唔會再鍾意游水，因為知道無論點樣游，都冇可能快過以前嘅時間。
汲取呢幾年來嘅經驗，令小方覺得凡事無絕對：「只要我肯放低一啲執着，淨係諗住做我自己鍾意做嘅事，我就唔會有壓力，冇壓力就開心，開心咪繼續游囉，游得多咪會進步囉，起點低唔緊要㗎，個進步咪會仲明顯囉，有進步個人咪會仲開心啲，咁都咁開心喇，咪會再練多啲囉。」
