連詩雅 同 陳家樂 上月為一歲囡囡小星星慶祝生，一家三口幸福滿瀉。近日Shiga於產後推出新歌，內容總結佢曾經任性嘅前半生，並接受電台訪問詳談組織家庭嘅甜蜜經過，形容同老公能修成正果係因為「適當嘅時候遇上適當嘅人」。
Shiga於2019年拍攝TVB旅遊節目《12個夏天》，而邂逅比自己年長2歲嘅陳家樂，Shiga指當初同家樂赴韓國拍節目時，二人都各有伴侶沒想太多，至翌年家樂邀請她上網上節目時，適逢都回復單身先開始約會。
節目中Shiga暢談家樂吸引之處，大讚老公純品又靚仔，感覺花花公子，但原來好old school style，夜晚要聽收音機瞓，朝早飲茶睇報紙嗰啲﹗日日食同一款男人飯，感覺有種傻氣，畀到Shiga穩定同安全感。Shiga喺家樂身上搵到嘅浪漫就係放心，例如佢去邊，佢會自動自覺話你聽，從來無check住佢。
Shiga坦言拍拖兩年已感覺家樂可以付託終生，至於婚後不足一年就成功懷孕，Shiga坦言係計劃亦係意外，「係想有小朋友，所以無特別避孕，但無諗過咁快、咁順利！」
Shiga指自己生理期一向唔準，大懵到懷孕兩個多月先醒覺驗孕：「最初仲以為感冒頭暈，兩個幾月先試吓驗。發現真嘅時候好surprise。」她更指家樂得悉自己要做爸爸時，不如外間想像般激動：「嗰日佢放工返嚟，我嗰刻好開心又有好多情緒，佢一開門我就爆喊，佢即刻問我：『乜事？做乜事？』我喊住話：『你做爸爸啦！』佢好冷靜話：『咁咪好囉！我哋係想有小朋友嘛。』或者當時太突然，佢無太大感受，但係隔咗幾日佢陪我去產檢，當佢睇到個mon，再聽到BB『噗噗』嘅心跳聲，佢就流眼淚，我哋兩個都一齊流眼淚。」
誕下女兒Camila後，Shiga話自己一直都想生女，至於老公就生仔多啲，因為想同囝囝一齊做運動，但後來都覺得有個女好sweet。不過家樂並未放棄追多個仔，希望湊成個好字。