陳奕迅 巡迴演唱會最終站星期六晚去到尾二場，Eason嘅太太婆徐濠縈、女兒陳康堤同父母等都去澳門支持，好友丁子高、楊千嬅夫婦、陳健安、AGA未婚夫鄭子邦等亦有捧場。
Eason 雖然之前自爆患上焦慮症仍需食藥控制病情，但係一上到台Eason狀態極好，令全場觀眾非常興奮，千嬅亦喺限時動態捕捉到Eason跳起使出摩打腳一幕，配上貼文「仍然摩打腳」﹐大讚Eason活力十足。
去到講Talk環節，觀眾瘋狂大叫同Eason互動，唔少歌迷大叫「Eason！老公！愛你」等聲音。聽到大家唔怕醜示愛Eason 忍唔住問其中一位叫得好大聲嘅女歌迷：「很想知道你叫什麼名字....哈哈！」此言一出，全場叫聲更大，令他根本無辦法聽到觀眾回應嘅聲音。Eason於是打趣話「叫BB啦！你再叫多次！」全場馬上向佢狂叫，佢即刻冧爆回應: 「點呀BB!」
開完玩笑後，見到畀咁多人叫老公，一向心繫太太阿徐嘅Eason，馬上向台下太太派定心丸話:「你們有沒有聽過MR.樂隊的一首歌，陳奕迅只得一個，老婆也只得一個！而且她是老闆！」叮囑大家可以叫佢男朋友，但係自己經已「嫁人」啦!
Eason又坦言從北京站開始，可能天氣太乾喉嚨裡生咗粒痱滋，一直去到澳門亦未痊癒，所以前晚依然把聲控制得唔好，不過呢晚痊癒了，狀態超級好。之後High爆嘅Eason又再搞笑話﹐自己喉嚨係最脆弱的地方，繼而自嘲指一指自己重要嘅部位，「除咗呢個之外⋯⋯」 似乎自嘲過往舞台意外令「蛋蛋」受傷嘅黑歷史。 最後Eason一口氣Encore四首歌，包括 《塵大師》 、《失憶蝴蝶》、《大開眼戒》及《單車》，令觀眾非常開心，滿載而歸。
