一年一度嘅慈善大騷《星光熠熠耀保良》隆重舉行，多位歌手為慈善出力演出，包括李克勤、陳曉東、馮允謙、關心妍、陳柏宇、吳若希、台灣歌手戴愛玲、連詩雅、黃妍、許靖韻、黎展峯、黃博、羅啟豪、譚輝智、古淖文、張馳豪、張與辰、詹天文、姚焯菲、黃洛妍、林智樂、鍾柔美等。
姚焯菲(Chantel)之前透露8月底就會飛美國升學就讀名牌學府紐約大學，做天后Taylor Swift、Lady Gaga嘅師妹，咁啱作為《聲夢傳奇》奶爸嘅李克勤，佢嘅大仔都會入讀呢間大學，而克勤就話Chantel未有同佢講升學呢件事，只係同佢講音樂，而克勤就叮囑Chantel出外讀書學做人比學業更加重要。
克勤自己覺得大仔18歲係時候要放手，放心畀兒子出外獨立，但係佢同太太會短暫陪兒子過去美國適應環境。
對好姊妹Chantel月底出發去美國升學，詹天文同鍾柔美亦為好姊妹打氣，期待Chantel 12月放假時回歸。
同場嘅吳若希最近工作忙碌，但係佢都安排時間拍攝節目《奇情谷》，講起節目迎來最後4集，佢都話好唔捨得，而節目組將會邀請一位好得意嘅男性新聞人物作為最尾一集嘅重量級安排。
關心妍相隔3年早前再同歌迷一齊開生日會慶祝，佢都話好開心可以好近距離同歌迷互動，而佢嘅Fans緊貼住佢嘅網上平台，知道Jade鍾意一種公仔，所以生日會上Jade都滿載而歸，連佢嘅女兒心心都一樣收到好多禮物。
黃博 同 張與辰 即將各自舉行個人演唱會，阿博請到師兄羅啟豪(Ramon)任嘉賓，阿博就話非常緊張，而Ramon相信師兄實力可以駕馭舞台。而張與辰呢日同 古淖文 同 張馳豪 有合作舞台，佢好羨慕Aska操得好fit可以大騷麒麟臂，與辰自爆自己操肌操咗六年都零成果，因為練幾下又忍唔到口，所以佢都話開騷真係無辦法騷肌派福利。
同樣難操肌嘅仲有譚輝智，佢自爆曾經試過請私人教練健身，不過上咗一堂後，因為成日同教練喺動作次數上討價還價，一堂過後被教練斷聯。
