吳業坤 除咗歌唱演戲，一直都積極開拓演藝以外嘅事業，近日佢就由健身室嘅用家，變成健身室嘅老闆之一。咁開心嘅日子，坤哥唔少圈中好友都現身開幕禮，包括啱啱宣布求婚成功嘅何廣沛、黃庭鋒、鄧智堅、Ronny黎澤恩同廖家爵等，而太太濱口愛子亦喺社交平台分享同老公嘅合照。
坤哥自從16年紅館演唱會時，經已同呢間健身室合作，趁住今次健身室開新店，佢就決定再拓展創業路，投資成為老闆之一，將自己嘅健身興趣成為事業，佢仲透露下一步希望同空手道師傅開設空手道館。
早前忙於拍攝《新聞女王2》以及跟胡鴻鈞嘅佛山演唱會，坤哥增磅唔少。開幕禮上仲令飛爺鄧智堅非常驚訝，估唔到坤哥咁短時間減磅唔少，坤哥表示返港後積極修身，而今次變換身份成為老闆，不過佢暫時未有打算考教練牌成為正式教練，希望自己鍛鍊得再好啲之後先諗。
