貼地親切嘅 前輩演員 馮素波 向來注重健康，她日仲應邀以星級用家身份分享保健心得。年屆81歲嘅波姐自爆曾諱疾忌醫，直到身體響起警號，先醒覺身體健康要超前部署，籲大眾及早檢查身體。
波姐日前出席分享會獲頒「星級用家」感謝狀，雖然笑言「人生冇健康，點生存」，不過亦提到過去諱疾忌醫：「我50幾歲時，身邊朋友成日話要驗身，佢哋30、40歲就去驗，我就唔去，總覺得『一間舊樓去檢查，呢度要補漏，嗰度要裝修，實要執好多嘢』，而家就明白，於是近年會定期做醫療檢查，令我了解更多。畢竟人梗係想長命，但長命得來要健康先有用！」
而4年前懷疑腸癌經歷，亦令波姐的起心肝關注長遠健康，全因為波姐說：「當時血色素低做檢查，之後照埋腸胃，仲懷疑腸有cancer，醫生當時話條腸有好多肉粒，仲有個幾厘米大住宿咗喺腸5至6年，一定要手術切除，醫生仲發現膽都塞晒，慶幸膽石冇黐到個肝，所以一晚就切除埋膽、割埋五分一腸。」
波姐又分享佢嘅獨門飲食貼士，一向唔食辣、煎炸同貝殼類食物，拍戲時又會經常帶備餅乾，等自己唔會餓壞，好好保養胃部。近十多年又養成早餐習慣：「醫生話早餐好重要，初初我亂食早餐，飲杯咖啡加兩塊餅，但原來咖啡對我唔適合。而家每朝食一隻烚蛋，增加蛋白質，而每日只會食一餐澱粉質。」
波姐又即席拉筋，柔軟度儼如後生女，有十多年瑜伽㡳子嘅佢話：「我近廿年每朝都會拉筋10分鐘，亦會丹田練氣，每日步行幾千步，我好鍾意出街，因為唔行多啲，對腳會冇力。」