劉德華 今年初完成72場巡迴演唱會後，日前再喺啟德體藝館舉行「華仔天地」專屬嘅會《你是我的驕傲2025演唱會》，慶祝歌迷會37周年會慶。呢次更係華仔相隔23年，再次以同樣嘅演唱會名稱開騷，可以話係意義非凡呀。
呢次華仔首登啟德開Show，無論係佢自己定「家人」們都充滿期待，華仔除咗精心策劃舞台之外，會場門外更設有唔少打卡位，而當中一個紅色郵筒，仲係特設俾「家人」寫下「給華仔的一封信」，旁邊嘅告示牌仲寫住「華仔一直知道家人們默默地支持著他﹗現在，我們誠邀你，把這份心意寫進紙上，讓華仔聽見你的心底話，讓他知道，你一直都在﹗」真係好有心思。除此之外，華仔嘅演唱會周邊產品亦大受歡迎，當中包括牛仔褲、手提袋、外套、T恤、無線充電寶、手機掛繩。
呢晚除咗唔少來自世界各地嘅「家人」嚟參加呢個大Party之外，華仔嘅太太朱麗倩、囡囡以及好朋友關之琳、顧紀筠夫婦、邱李茂琪夫婦等等都係座上客。華仔以一曲《因為愛》揭開序幕，呢晚前後一共唱足37首歌，唔少更係大家嘅集體回憶，最後又兩度Encore，以《可不可以》劃上完美句號。
