唱作新人 林暐竣 （Regent）首支派台歌《給月亮的情書》，由自己一手包辦曲詞編監唱，將鄧麗君嘅永恆經典《月亮代表我的心》融入當中，呈現世代隔空交流。
新歌MV由電影導演 羅耀輝 執導，主題圍繞一段異地戀。Regent喺MV同女友分隔兩地，呢種異地戀要花唔少心思維繫，所以Regent要喺MV做出唔少甜蜜舉動，例如拍片向女友分享整早餐過程、偷偷繪畫示愛、又向對方自彈自唱情歌等。
對於導演指示嘅不論係煮嘢食抑或整早餐，Regent都可以順利完成，唯獨要拎80年代潮流聖物Walkman時，Regent就顯得束手無策。MV畫面本來交代Regent將鄧麗君嘅錄音帶放入Walkman內再播放，但對千禧年出世嘅Regent，每個步驟都好似奇妙之旅，要點樣打開部Walkman、點將錄音帶放入去、憑咩決定係播Side A定係Side B……每一樣都令佢充滿驚喜。
不過對Regent嚟講，全日最高難度一幕，竟然係要佢扮瞓醒一刻！事關導演要求Regent赤膊上陣，展現半裸睡姿嘅撩人情景，但Regent就覺得好尷尬：「我以前身形比較肥，甚少喺大家面前除衫，近年開始勤力做GYM，叫有少少成績，但要喺咁多人面前半裸都係第一次，而且全場目光都集中喺自己身上，令我好唔慣。」
加上呢個場面係MV首個鏡頭，Regent怕醜到連簡單起床動作都頻頻NG，亦因為擔心影響大家而覺得抱歉，場面非常搞笑。雖則怕醜，但Regent都注重自己體形拍出嚟嘅效果，所以每逢等埋位就會爭取時間做掌上壓，盡量令胸肌上鏡時好睇啲。
要數全日拍攝，最令Regent表現得輕鬆自在，就一定係自彈自唱一幕。原來只要拎起結他，Regent就會變得判若兩人，所有怕醜都會一掃而空，換嚟係一份自信、自在、自我，邊彈邊唱極為投入，現場瞬間變成Regent迷你演唱會，導演都好滿意佢表現，拍咗幾個Take就收貨，大家提早收工。
