蔡少芬老公 張晉 曾參加內地唱跳競技綜藝節目《披荊斬棘的哥哥》，仲係節目嘅初代 X-Leader。近日節目第五季開播，張晉就以X-Brothers 成員身份再度參戰，再度挑戰自己。
張晉喺節目中帶傷上陣，為呈現最好嘅歌舞表演而進行密集式練習，而佢喺休息時同成員李承鉉傾偈時，就提到自己喺今年四月同太太蔡少芬以及3名仔女去旅行時發生一件危及生死嘅驚險事。
張晉當時太太帶小朋友排隊搭旅遊船，而自己喺10幾米外突然心臟病發，佢憶述當時心臟突然感到一股疼痛，更呼吸困難、全身出冷汗，但當時無法叫到Ada，只知道如果自己瞌埋眼就一定會「走」，所以佢個腦淨係得一個念頭，就係要撐住：「我不能死在這裡，因為這裡是國外，她還帶著三個孩子，老公沒了她怎麼辦？我一直撐著，不能在這裡倒下！」最後張晉憑超強求生意志避過一劫，返港後亦馬上做身體檢查並接受心臟支架植入手術。
張晉形容呢次事件係佢人生第一次體會到同死亡好接近，亦因為呢次「死過翻生」令佢更珍惜同家人相處時光。
