《中年好聲音4》進行第一輪海選，參賽者臥虎藏龍，今屆多咗唔少實力好強嘅過江龍報名，好似嚟自重慶嘅參賽者Aihan Yang、來自台灣嘅張振文，仲有由德國同日本特登飛到香港參賽嘅袁傑文同埋森腰充宏，佢哋位位都咁唱得，唔講係海選，仲以為睇緊決賽。
而香港本地薑嘅實力一樣唔嘢小，更有人以腹語應戰，以特別嘅方式演繹《獅子山下》令評審大開眼界。而係云云嘅參賽者當中，唔少更係比賽經驗非常豐富，好似24年前曾經參加過新秀及09年參加過《超級巨聲》嘅何晶晶，呢日再踏《中聲》舞台接受海選，佢都話心情緊張過生仔呀，仲話《中聲3》嘅黃博同埋陳芷盈嘅歌聲令佢好感動，佢希望日後都有機會同兩位合作。
參賽者當中，有小學校長為咗參賽而辭職、有《中聲3》100強不入嘅參賽者捲土重來、有視障嘅鋼琴調音師、仲有遺體化妝師，當中仲見到本身已經係歌手嘅陳逸璇，真係各行各業都無阻佢哋對音樂嘅熱誠。
肥媽、張佳添同海兒睇完第一日嘅海選，不約而同話對《中聲4》好有信心，添Sir話好開心見到參賽者一屆比一屆好，又勁、又有驚喜仲好有特色添，而肥媽都大讚今屆水準相當高，所以自己比分都手緊咗。《中年好聲音》邁入第四季，參賽者實力越來越強，報名人數有增無減，今次參賽人數更超越5800人，曾志偉都話好期待可以幫更多有夢想嘅中年人圓夢。
