陳奕迅 世界巡迴演唱會經歷近三年時間，8月10號晚喺澳門舉行第182場終極尾場，太太徐濠縈同囡囡康堤都有捧場，Eason仲罕有公開多謝妻女。Eason喺終極尾場亦豁出去唱爆場館，連Encore都唱足12首歌先肯落台，包括：《超人的主題曲》、《浮誇》、《時代曲》等，Eason臨落台前向觀眾揮手道別：「多謝大家，我地後會有期。」
完成咗呢次壯舉，Eason喺慶功宴上非常興奮，仲拎咗200萬打造千足金紀念幣俾跟足巡演嘅戰友們。能夠以最佳狀態為巡唱畫上完滿句號，Eason都好滿足，佢仲話，覺得自己終於可以享受到而唔係緊張，成個感覺都好舒服。雖然唱《浮誇》時有少少不足，但都唔緊要。Eason仲話得到醫生同意，可以開始嘗試停食焦慮症藥物添！
