金馬導演 張吉安 執導嘅《搖籃凡世》星期日喺馬來西亞舉行首映，導演同主演 廖子妤 許恩怡 大馬演員 蔡寶珠 陳美玲 與 原騰 等一同現身，吸引逾百人圍觀，場面熱鬧。
《搖籃凡世》以大馬一間24小時營運棄嬰保護艙作背景，講述一段關於遺棄同挽救、創傷與療癒嘅感人故事。電影先後於十多個國家同地區放映，好似《第37屆東京國際電影節》亞洲未來競賽單元、入選《第6屆海南島國際電影節》金椰獎競賽單元同《第27屆上海國際電影節》年度亞洲電影單元等。
一直於香港發展嘅Fish首度回家鄉拍戲，更飾演一名馬來西亞人，對佢意義非常重大。Fish一家亦到場支持Fish，佢仲非常感恩導演令佢圓夢：「第一次有機會演一個道道地地嘅馬來西亞人，等熟悉我嘅香港觀眾，可以用另一個角度重新認識我同我成長嘅地方。」
Fish又指同Natalie因為呢部作品建立姊妹情，好自然地將情感依靠喺Natalie身上，記者會上兩人更互笠高帽，Fish指Natalie似小太陽一樣照耀自己，而打趣形容係「忘年之交」。Fish話：「Nat完全將我帶入角色中，呢種合作變成了一種相互成就，而私底下她就似足一個小太陽，成日好多鼓勵、安慰，好感謝佢嘅陪伴。」
而Natalie就話：「我表面陽光，但內裏其實好緊張、焦慮，好感激Fish成日主動分享心事，佢唔介意講出嚟令我覺得好釋懷，亦更容易建立信任，對我哋戲中關係有好大幫助。」
飾演懷孕少女「小曼」嘅Natalie角色非常沉重，但提到對大馬最深刻印象時，佢就笑指：「呢度好多Kuih（糕點）、好多Motor（摩托車）、蚊冇想象咁多，但最重要係，呢度嘅人真係好善良、溫暖。其實我對喺雪州米南加保村落拍攝印象特別深刻，喺嗰度生女會慶祝、女性擁有財產同決策權，頭上所戴嘅牛角代表住力量、女性嘅智慧同尊嚴，呢個母系社會文化令我相當驚訝。」
