《2025香港小姐競選》14位佳麗同大師姐 陸詩韻 見面取經，學吓點樣扮靚。一眨眼原來Sharon已經參選港姐20個年頭，所以見到一班小師妹即刻回憶湧現，尤其經過錄影廠同化妝間時。
而接觸過小師妹們後，Sharon覺得而家嘅佳麗比佢哋當年認知多好多，談吐又順暢得多。佢覺得佳麗上台後，唔係等被人批判，而係盡量令自己發光發亮，所以喺參賽嗰兩、三個月內，要盡量去享受覺得自己係最靚最好。
1號李尹嫣、9號陳詠詩同11號梁倩萱，榮登今個星期「2025香港小姐網絡最強人氣」TOP5頭三位，11號梁倩萱覺得可能係自己扮演《新聞女王》嗰條片段吸引到大家。9號陳詠詩話好多時收到網民私訊都會回覆，多謝大家支持，1號李尹嫣話因為參選而作出新嘗試，增加使用社交平台次數。
Sharon喺見面會上除咗分享美容心得，仲教佳麗們點保持健康心態去面對負面新聞，3號蔡華英話對於被指頸長同大細眼，自己嘅心態覺得反而係諗點樣做得更好。4號莫凡話Sharon教大家要明白唔可以避開評論，再去分析評論內容，研究使唔使改進。6號朱文慧話自己面對多人講嘢嘅情況下就好緊張，Sharon教佢可以透過平日嘅訪問去慢慢訓練。13號袁文靜喺2025港姐特訓班中，挑戰Rap嘅片段獲近50萬點擊，令佢意想不到。
