中聲歌手 占士丁丁 日前舉行歌迷聚會，一齊嘆吓西餐、唱下歌，更有粉絲帶埋仔女嚟支持偶像，令丁丁特別興奮。丁丁平日形象Rock爆，呢次喺聚會佢就精心挑選咗啲抒情歌，好似《Perfect》、《Can’t Help Falling In Love》，又特別學唱中文歌《愛我別走》。
丁丁就話，時常鞭策自己學好廣東話同國語，目前兩樣同步學習中，一切進展順利，好似BB學行路咁。 丁丁早前為工作首次踏足美國紐約，雖然逗留嘅日子唔長，但佢都有把握時機遊覽一番先返香港。丁丁形容呢次美國之行令人超級興奮同驚喜，亦睇到好多新事物。而調整時差都係一件難事。佢話未試過咁攰，好似全身顛倒一樣，下午五點先起身，凌晨兩、三點去做運動，加上三個月後會開騷，佢都想操靚個Body同大家見面。
《中聲3》唱將陸續推出自己個人單曲，丁丁預告自己都有望出歌，而佢都好期待新歌誕生，仲透露好大機會會係廣東歌呀！
