距離8月31號晚舉行嘅《2025香港小姐競選》決賽仲有唔夠三個禮拜，連月嚟14位候選佳麗都不停接受特訓，希望以最佳狀態迎戰。一眾候選佳麗呢日換上泳裝喺酒店泳池會見傳媒，展現佢哋美好身段同健康氣息。佳麗們狀態越嚟越弗，有部份佳麗更加係比之前清減唔少，相信背後落咗唔少苦功。
7號施宇琪自爆兩個月冇同過父母飲茶，為咗減肥更可謂不惜一切，佢話自5月28號報名至今減咗6公斤，現時大概係54公斤。佢話如果唔係參選港姐，自己覺得咩體重都有信心，但如今既然報名選美就當然瘦咗會令信心更大。14號何詠多自言瘦咗唔少，因為堅持唔食麵包及飯，飲食方面亦以清淡為主呀。
2號甘詠寧前後減咗5公斤，佢話參與港姐之前成日都話減肥，但每次都堅持唔到，相反今次有明確目標，所以想挑戰自己去做好呢件事。13號袁文靜大讚Phoebe利害，因為當大家食零食時，Phoebe都可以忍口。1號李尹嫣就話減磅唔算太辛苦，因為自己之前磅數基數較大，相對其他佳麗嚟講，自己係應該努力啲。
至於有部份佳麗磅數就增加，4號莫凡解釋磅數增加嘅原因，佢指首次磅重時係極端脫水，所以嗰個體重唔係自己嘅真實重量，之後磅嘅時候係食咗午餐上磅，不過都會繼續努力瘦身，佢仲自爆為咗氹自己帶飯可以食得更健康，所以特登買咗個得意飯盒。
而5號曾閱遙指平時都一直有健身，自覺上鏡冇乜分別，而重量重咗嘅原因，可能係多咗肌肉。另外，12號庄靜璟表示平時好攰嘅時候都會選擇食啲嘢去獎勵自己，佢覺得女仔唔應該對身材有咁多焦慮，因為自信最緊要。
《港姐最美任務在檳城》星期六晚 20:00 翡翠台