8月12號係昆凌嘅32歲生日，愛妻號 周杰倫 一早安排好連串慶祝活動同太太慶生，好似日前佢哋就結伴去欣賞江蕙演唱會，之後又舉行儀式感滿滿嘅生日會。兩人更先後喺社交平台出po大放閃光彈，周董上載咗同壽星女甜蜜合照，更寫上一句「My birthday girl」，而背景音樂就用咗自己嘅金曲《可愛女人》，雖然昆凌已係三孩之母，但係相信喺周董眼中，老婆依然係一個可愛嘅小女孩呀。
相中所見，周董除咗準備咗一束鮮花氣球之外，仲有一個巨型H字樣嘅生日蛋糕，代表昆凌英文名「Hannah」，真係好有心思。甜在心頭嘅昆凌開心到連出兩條發文：「謝謝你的驚喜，大家的祝福我有看到喲，謝謝你們」，之後再嚟一篇：「又是一個環繞太陽的旅行，非常感謝所有美麗的生日祝福！對於每一個訊息、呼喚和擁抱，感受到真正的愛和感激。從甜言蜜語到驚喜擁抱，你讓我的一天變得特別，我的心（和蛋糕）滿了，覺得感恩，感覺被寵壞了，感覺被愛。」
有眼利嘅網民就發現，昆凌少有著上寬鬆上衣，加上唔知係咪衣物材質問題，令佢嘅腹部睇起嚟微隆，因而再次引起網民揣測佢係咪懷上第四胎，紛紛留言問「是不是懷孕了？」、「我前兩個月就懷疑了，感覺有點真」、「怎麼感覺又有小小周了呢？」。喺一片猜疑聲中，亦有網民表示「能不能不要老是盯著別人的肚子看？穿寬鬆的衣服是自己的自由」。
