日前憑《黑色月光》入圍「2025亞洲影視內容大獎」最佳女主角嘅 楊茜堯 ，最近就同老公 羅子溢 疑似撇低仔女去咗泰國享受二人世界。
子溢喺社交平台分享咗幾張同太太享受當地美食嘅照片，並寫道「We time」，明顯呢次嘅泰國之行，兩公婆食咩都唔再需要遷就一對仔女，可以話係想食咩就食咩，呢種味覺嘅自由真係只有父母先明！
相中所見，放低甜蜜負擔嘅楊茜堯同子溢，去咗當地老字號嘅米粉店食米粉湯同炸魚皮，之後又去咗飲嘢兼品嚐當紅甜品店嘅泰茶味綿花冰，而喺其中一條片入面，仲見到子溢好似大爺咁，坐喺度擘大口等太太餵食，享受完太太投餵後佢仲畀出評價：「唔錯！」睇嚟子溢好滿意食物嘅味道同太太細心嘅服侍。相信呢次佢哋快閃泰國之行，一定可以叉足電，準備迎接嚟緊嘅工作以及陪仔女開學呀。
