顏米羔日前現身影樓為佢嘅演唱會進行海報拍攝，平時佢影人就影得多，呢次企定定做被影嘅對象，都令米羔感覺新鮮。雖然呢次佢擔任創作總監，但喺造型上就完全交曬畀專業人士打理，出嚟嘅效果佢都相當滿意。米羔話拍攝過程冇插手，選擇人生第一次專心去被人影自己。
米羔呢次開Show以「音樂旅程」做主題，更大賣關子表示喺海報埋下咗好多小心思，至於喺歌單上佢亦有精心編排過，如果大家入場欣賞，可以了解到米羔係邊度走出嚟，參加過啲咩歌唱比賽，平時會唱啲咩歌，同時會同佢一齊去迎接將來。
至於嘉賓方面，米羔話請咗好多人嚟，不過就係座上客去欣賞自己個騷。男歌手開Show都少不免會操肌練好個Body，米羔話經已好努力，若果趕得切有成果，就會騷畀大家睇。
