楊千嬅 正式宣佈11月底將再度登上紅館舉辦演唱會，慶祝出道30周年，千嬅指今次演出係對佢滿載回憶嘅音樂旅程紀錄，亦係一場同歌迷充滿情感與回憶嘅慶典。
今次係佢時隔7年再於紅館開騷，千嬅仲形容呢次係佢音樂人生中嘅重要里程碑：「由《MY Tree Of Live》到《Live MY LIVE》，係我人生中好重要嘅一個階段，今年係我出道30周年。」
由21歲入行到如今51歲，佢嘅三十年演藝生涯充滿挑戰同感恩：「我從冇諗過可以走到這一步，好慶幸喺一個好好嘅年代，同優秀嘅團隊仲有唱片公司合作，用勤力換取認同，呢個係我做人嘅基礎。」
佢又特別感謝一直支持自己嘅歌迷，部份更係由小到大嘅Fans，甚至子女都被『強迫』聽自己嘅歌，令楊千嬅笑言歌迷嘅熱情令佢感受到無比溫暖。而家人，合作無間嘅團隊，仲有為佢創作嘅作曲同填詞人。「我好多謝自己冇放棄，亦感謝所有支持我嘅人。」
千嬅指呢次演唱會歌單唔止包括經典主打歌，亦會演唱唔少「minor」side track歌曲，甚至從未於舞台上演繹嘅作品。舞台設計同呈現方式亦與以往大有不同，承諾會帶俾觀眾前所未有嘅體驗。
千嬅更特別提到，今次演唱會係對歌迷30年支持嘅回饋，尤其係不辭勞苦由各地前來港嘅朋友：「我知你哋為睇我嘅演唱會，付出時間同金錢成本，所以我希望你哋來港，感受到最地道嘅廣東歌文化。」仲笑稱今次猶如「米芝蓮級別私房菜」，是佢同團隊為30周年獻上嘅心血結晶。
坦言從未預料自己50歲仍站於舞台嘅佢話：「我本以為30幾歲就會退休，但倔強同唔服輸令我走到今日。今次唔止係記錄我自己嘅30年，亦係你同我之間嘅30年。」