唱作歌手 陳健安 推出新歌《沒有時間》MV，仲邀請 張惠雅Regen飾演女友，兩人喺MV中有大量親密恩愛互動場面，安仔餵Regen食嘢之餘，又孭住對方遊街，仲有一啲面貼面錫額頭嘅畫面，非常甜蜜。
原來MV嘅一切都係配合之前音樂企劃，新歌故事設定喺「磒石撞地球」前一刻，安仔突然被女友狠飛，於是邊執行李邊回憶已逝去嘅甜蜜片段，情緒一觸即發爆喊，喊到連攝影師都話戥安仔心痛。
安仔可以話係演技大爆發，一鏡到底，完美演繹否認、憤怒、討價還價、抑鬱同接受「分手五階段」，仲話冇諗過自己會爆喊，事前亦同大家討論過，認為啱啱被分手嘅人應該未接受現實、未太傷心，但唔知點解嗰一刻就突然崩潰起嚟。
新歌由徐繼宗作曲、Oscar填詞、賴映彤編曲，安仔一同參與監製。今次主題同後末日時空有關。之前Regen曾喺安仔嘅《我違和但我不糾正》MV演出，兩人私下亦係好朋友，今次拍攝溫馨拍拖情景時，兩人都表現自然投入。
曾患腳傷嘅安仔二話不說孭起Regen喺街上跑，佢最初都有啲擔心，因為腳傷之後未試過負重，好彩Regen夠晒輕！除咗幕前演出，安仔亦感謝Regen為MV拍攝團隊親自下廚準備膳食，令台前幕後都大飽口福。
