資深演員程東喺上世紀憑喺周星馳電影系列擔任「御用反派」為人熟悉，喺電影《賭俠》中飾演嘅「大軍」一角更係佢嘅代表角色之一。早年轉戰內地發展嘅程東已經喺廣州扎根，仲喺2011年同細自己19歲嘅女友劉亞娟結婚，二人育有兩個寶貝女，擁有一個幸福家庭。
程東雖然喺香港娛樂圈鮮有再出現，但佢喺內地密密接落唔少電影同商演，最近佢仲拍片為最新主演嘅網絡大電影宣傳，喺戲中飾演神秘南方老板。雖然已經年過60，不過從片中可見，程東睇落仲係好大隻，亦好精神，一啲都唔係63歲嘅年紀。
其實程東除咗電影外，都有電視劇代表角色，當年喺《我和殭屍有個約會》第一輯嘅「阿平」亦係唔少人嘅童年陰影。程東喺電影《九品芝麻官》飾演來福後，就冇出現過喺星爺嘅電影中，佢就話因為自己出名後加咗片酬，星爺嫌貴而唔再用佢。程東雖然鍾意拍戲，但無奈被迫轉行，轉往發展廣告業，試過一度零收入。不過好在過去角色經典，程東最後憑過去角色名氣喺內地演藝圈都闖出一番事業。
