今屆港姐競選仲有半個月就會舉行決賽，日前先以泳裝同公眾見面嘅14位佳麗，連日一直接受唔同訓練，而多位師姐前輩亦分別為佢哋提供唔少貼士，呢日就到 馮盈盈 同大家見面喇，來年就入行10年嘅佢，就認為保持笑容非常重要喇。
14位佳麗當中，FYY就覺得 7號施宇琪 變化最為明顯清減唔少喇。而雖然呢日同一班師妹分享講極都未夠，不過佢就又要急急腳為新一輯《剪裁魔法師》拍攝，仲提到會同 森美 合作主持，繼續發掘本地極有才華嘅設計師呀。
而被師姐大讚嘅Angela，與及 1號李尹嫣 4號莫凡 仲有 12號庄靜璟 都一樣受外界注目，劍橋出身嘅Angela雖然學業成績強勁，估唔到佢原來講爛Gag都有一手，隨時準備帶歡笑俾大家之餘，就連其他佳麗亦受惠，佢仲打算以幽默感迎戰問答環節呀。
Victoria就話非常感謝親友、網友嘅支持轉發自己嘅報道，而Molly就謙虛指唔覺自己人氣高喇。
而 9號陳詠詩 就指會努力排舞走位，而 6號朱文慧 就勤力複習過往嘅問答環節，希望可以學到前輩嘅機智反應呀。
《港姐最美任務在檳城》星期六晚 20:00 翡翠台