熱播嘅求愛真人騷《女神配對計劃》進入尾聲，五位女神 葉蒨文 、李芷晴Stephaine、關嘉敏Carman、羅毓儀Yuki同梁敏巧Maggie同多位求愛勇士成功提升人氣，佢哋嘅真摯溝通更集集都有熱門話題。
當中女神嘅擇偶條件同意向更喺觀眾心目中有咗定案，好似葉蒨文同曾展望GM呢一對由節目開播以來已深入民心，有追開節目嘅你哋都想兩人修成正果，但佢哋嘅發展最終會係點，就一定要留意住節目嘅消息。
節目除咗造就緋聞令人食花生之外，都有實際好處，由於節目受歡迎，所以直接帶挈佢哋搵外快嘅機會，就連主持人阿Bob林盛斌都受惠，可以同女神Sophie接拍廣告吸金，阿Bob喺社交平台展示出同Sophie嘅合照，兩日以簡便裝束上陣，並留言話：「我唔係林子祥，我係林盛斌，我哋唔係拍節目，係一齊拍廣告。」並多謝客戶，期待完成品。
最後阿Bob都不忘為節目宣傳問大家：「題外話，我想問，GM、Eddie、阿謙，你哋覺得邊個同Sophie最襯？」唔少識趣嘅網民大讚當然係阿Bob最襯啦，但大多數人都力推GM，更有人話點都唔係阿Him(阿謙)。
《女神配對計劃》星期日晚 21:30 翡翠台