陳展鵬 吳若希 同 張振朗 8月16號喺三藩巿開騷，日前大家已各自出發做準備。展鵬如常帶同老婆 單文柔 同行，兩夫妻仲提前到達享受小旅行，雖然逗留時間唔算太長，但對於展鵬同Phoebe嚟講已經係一個好浪漫嘅時光，而且喺照片中更見到好多夫妻視覺嘅相片。
展鵬同Phoebe喺社交平台分享旅行照，原來今次除咗工作，亦係探親之旅，Phoebe留言指：「上次富國島為豬比而設，今次呢個行程專為陳生而設，做show前提前幾日到，提早調教jet lag，沒有特定行程，只係探下親，到Napa Valley逛逛，到酒莊走走，沿路上，開車時候，沖涼嘅時候，我睜開眼嘅時候，都伴隨着你嘅歌聲。」
展鵬亦貼出自己坐上納帕谷葡萄酒列車(Napa Valley Wine Train)前往酒莊時，一邊食嘢一邊從身旁嘅玻璃窗欣賞戶外景色，雖然喺畫面中唔見囡囡小豬比，但見展鵬隨身帶同一個一家三口嘅小小人型擺設合照，估計係當地一啲小工藝品。
展鵬亦同樣留言指旅程中沒有行程表，唔使追趕時間，坐吓百年復古嘅車廂感受吓加州嘅氣息同風景，值得同大家分享放鬆吓呢個無拘束嘅旅程。
