日本兩位女神柴咲幸、滿島光合作演出新戲，戲中連繫兩位嘅小田切讓，呢日就未有現身宣傳。柴咲幸飾演小田切讓嘅妹妹，因為參加多年未見哥哥嘅喪禮而同飾演前阿嫂嘅滿島光相遇，滿島光同柴咲幸、小田切讓雖然喺之前嘅作品中有碰頭，但係到今次先真真正正有大量對手戲。
滿島光細柴咲幸幾歲，但係對2008年以演員身份再出道嘅滿島光嚟講，17歲經已首拍劇嘅柴咲幸算係佢嘅大前輩，所以可以同柴咲幸合作佢都相當開心，佢話記得自己讀高中或大學時，跟住大哥哥大姐姐去䏲戲，正正就係柴咲幸同小田切讓合演嘅電影，所以可以同兩位合作，心中嘅確意義重大。
因為新戲以親情為主題，拍完呢部戲柴咲幸對向家人表達愛意呢方面都有新嘅體悟，佢發覺自己係一個不善言辭嘅人，尤其對住最親近嘅家人，都好難將愛表達出嚟，不過又好難一下子改變自己性格，所以佢話都要諗下要點去改善一下呢個問題。
