49歲嘅韓國男星 金鍾國 18號拍攝節目《Running Man》時，無預警宣布婚訊，令在場嘉賓同一眾主持驚喜又震驚，之後佢喺粉絲後援會網站「Papitus」上傳親筆手寫信報喜，一開頭就寫到「我要結婚了」，正式宣布將成為新手人夫，大批粉絲紛紛留言送上祝福。
金鐘國喺信中寫到：「雖然內心一直準備著，總有一天我也會親自寫下這樣的文章上傳，但真的要動筆，比想像中更激動和悸動」。佢感激話：「我希望最先告訴長久以來相信我、支持我，總是站在金鍾國這一邊的粉絲們，因此上傳這篇文。」
佢高調放閃話：「今年是我出道30周年，但是專輯還沒做好，反而先做出了我的另一半。」文中可以感覺到金鐘國嘅興奮心情，不過佢非常保護另一半，未有透露金太身分。
佢表示婚禮會低調舉行，「婚禮會在近期的時間，以不算大的規模進行，只會邀請家人、親友以及少數好友低調舉行」，佢亦不忘感謝粉絲嘅陪伴，「因為有粉絲們長時間以來給我很大的力量，我才能成家，迎接人生的新挑戰，我會成為更加努力認真生活的金鍾國，謝謝大家」。
佢嘅經理人公司「TURBOJK Company」表示，「金鍾國婚後會持續歌手活動，最近忙著籌備30周年紀念專輯和10月的演唱會，能在特別的年份展開人生新的一頁更具意義，希望外界能以溫暖的視線給予祝福和支持。」
查實金鐘國結婚早幾個月已經有蛛絲馬跡，事關佢今年5月份先豪擲62億韓元(約3480萬港元)購入豪宅，仲不避嫌表示「人要做準備才能結婚啊！」而《Running Man》嘅一眾拍檔對於金鐘國嘅婚訊都表現得非常驚喜，當年另一位班底HAHA結婚時未有第一時間通知自己，金鐘國就曾經講笑話如果到自己結婚，一定要大家透過新聞知道，如今都可以算係兌現承諾。
金鐘國因為長壽綜藝節目《Running Man》深受觀眾喜愛，身型壯碩嘅佢經常喺節目中展現呆萌一面，歌手出身嘅佢擅長唱抒情歌，真人完全係鐵漢柔情嘅代表。金鐘國喺另一大熱節目《我家的熊孩子》中因為常年單身嘅形象，所以經常被金媽媽公開催婚，如今金鐘國抱得美人歸，相信金媽媽發夢都識笑喇！
