TVB戀愛真人騷《女神配對計劃》成功引起全城熱話，最新播出嘅第11集，亦係dating camp嘅最後一集，最終有兩位求愛勇士被淘汰，包括李芷晴組嘅Jaden以及葉蒨文組嘅阿謙，過程感動催淚。Jaden亦喺節目播出後，喺網上發長文分享一路走來嘅心情。
Jaden以「屬於我同Step嘅故事終於完結」作為開場白，佢話作為一個素人參加者，今次係一個美好且刻骨銘心嘅旅程。Jaden回憶參加節目一路走來嘅點滴，包括同女神初見面，因為緊張頻頻讀錯對方英文名，以及入camp後主動邀請Step拖手，係佢喺節目中做過最大膽嘅事。
Jaden大讚Step係真女神，「佢工作非常勤力、長時間拍攝到只剩數小時休息時間、會照顧所有人嘅感受、甚至因為任何一個人不愉快而令佢內疚很久、對世間所有嘅事，佢都保持友好及友善嘅態度。」Jaden話當自己得知Step需要做抉擇，自己感到非常痛心，「我知道又會令佢非常難做，好想幫佢分擔，因此，我主動要求佢淘汰我。」
Jaden喺之前播出嘅集數中得到同女神同房過夜嘅機會，可惜未能把握優勢，後繼乏力遭到淘汰，不過佢非常有風度，除咗感謝所有台前幕後，亦祝願節目中其他求愛勇士可以追到心儀嘅另一半。包括主持人阿Bob林盛斌、兩位女神關嘉敏同梁敏巧、羅毓儀組嘅Kris林俊其、關嘉敏組嘅細John姜卓文以及Matthew都有留言為Jaden打氣。
