陳敏之 同 沈震軒Sammy 喺經典劇集《使徒行者》中，飾演一對生死相隔嘅情侶，當時被網民封為虐心CP。11年後呢對虐心CP終於再次相聚，敏之 同 Sammy日前喺廣州合體舉行音樂會，並喺音樂會上延續佢哋嘅故事。
音樂會中其中一個環節，敏之同Sammy以劇情故事配搭歌曲成就一段音樂劇，11年後阿Yan（陳敏之飾）同Kobe（沈震軒飾）終於再次合體，為觀眾帶嚟滿滿嘅回憶殺。敏之表示好感謝Sammy邀請自己一齊去做呢個音樂會，同時多謝fans咁鍾意佢哋：「見到大家好多留言話我哋個樣沒有什麼變，唔會太抽離，所以希望今次呢個音樂會都觸動到大家，睇完個show都會得到一些訊息，唔單只係一個娛樂。」
雖然音樂會圓滿結束，不過敏之只畀自己剛好合格嘅分數，佢又指自己準備呢個音樂會前，因為連續有幾日嘅直播工作，所以喺綵排當日就病到接近失聲，要即刻睇醫生打針同聞氧氣。
然而到音樂會當日，敏之都仲未完全康復，佢指係靠Sammy同觀眾嘅支持下先可以堅持落去：「都唔想大家擔心，所以就冇同大家講我唔舒服，希望觀眾體諒，感激大家冒雨支持。之後會好好休息，並且會好好記住今次與劇迷樂迷共創的回憶。最後更加要感謝歌迷會做咗好多應援物。」