由 汪明荃 蔡少芬 朱茵 黃宗澤 譚俊彥 姜大衞 蔡潔 鄭希怡 等合作演出嘅新劇《風華背後》，星期日舉行開鏡儀式，同場亦為Liza姐預祝月底嘅生日。新劇陣容鼎盛，朱茵更係相隔22年來回巢演出，加上同Ada呢位好姊妹合作，佢哋都話非常期待呀。
而Ada嘅老公張晉，日前公開早前一家人旅行時自己身體突然不適，幾乎客死異鄉靠意志死頂返港，Ada呢日重提都一臉憂心，指張晉返港後發現心臟有血管8成閉塞。張晉更指當時一度以為自己會告別塵世，一直諗住家人先由鬼門關重返人間。同為人母嘅佢哋，一提起小朋友將踏入青春期，就又有另一重擔心呀。
多年來未有戀情公佈嘅Bosco，呢日就被記者借Liza姐把口狙擊喇，連Liza姐都擔心佢感情零分，希望快啲有人照顧佢喇。而家英哥早前受訪將近年生活同病況大公開，亦令Liza姐非常頭痛，仲鬧到老公不得了，更話幾十歲人難以制止家英哥繼續大鳴大放呀。
John哥劇中同Liza姐扮演一對，雖然大家都從影多年，不過原來新劇係兩人首次正式合作，非常難得，仲講笑話自己好驚喎。而Shaun就同乎茵合演，仲爆有少少親熱場面呀。
