林子祥 同 葉蒨文 連續4次申請紅館檔期後終於獲批，嚟緊10月將會喺紅館舉行5場演唱會，呢次亦係佢哋相隔27年後再次合體開騷，可以話係難能可貴，所以門票一開賣已經全部售罄。
為咗以最佳狀態同歌迷見面，兩夫婦已開始積極備戰，日前阿Lam嘅兒子 林德信 仲再次帶同17個月嘅囡囡 林明 到Band房探班。林明一出現就令整個Band房更充滿活力，可愛嘅佢不時喺Band房跑嚟跑去，大擺可愛表情，仲走到Sally面前黐實Sally，令練緊歌嘅佢都忍唔住邊抱住孫女邊練歌，畫面非常溫馨。
Sally同阿Lam而家有孫抱，另一邊廂嘅 古巨基 相信就有仔萬事足喇，啱啱過咗53歲生日嘅基仔，亦喺社交平台大曬囝囝Kuson送咗全世界只得一件嘅Tee比自己，呢件Tee嘅字同圖畫都出自Kuson嘅手筆，Tee前面寫住「Best Papa Ever」、後面則寫住「生日快樂超人爸爸，我愛你」。
除咗呢件充滿愛嘅Tee之外，基仔仲收到一張睇到都眼濕濕嘅生日卡，寫有：「Dearest Papa, happy birthday. I’m so lucky and happy that you are my “PAPA”,I will love, treasure and adore you forever」。
心都融埋嘅基仔，亦感性發文：「這幾年因為他，每次節日、生日都多了很多不一樣的幸福感。看過很多文章影片說過，父母與孩子很多習以為常的事，總在不知不覺地隨著時光眨眼便過去。哪一天我們已抱不起他們？哪一天他們不用我們再牽著手走路？哪一天他們跟朋友相約不用我們再帶去街街？………我一定會繼續捉緊這些在漸漸流逝的時刻，因為這些時刻都是我的人生意義，也是我將來回看時最美的回憶。」
