龍婷 一連三晚嘅西九個唱18號晚隆重開幕，現場座無虛席，樂易玲 韋綺姍、中一戰友 魏嘉信 同中三生 劉洋 都有現身支持。
龍婷以一曲《不了情》為全晚演唱會揭開序幕，之後佢一口氣唱咗《明日天涯》、《讓一切隨風》、《夢中人》等三首經典。開騷當晚天氣不佳，龍婷都好感激大家無懼風雨嚟捧場，又分享今次演唱會分為過去、現在、將來三部分，自己問過音樂總監梁榮志點解會選呢四首歌做開場歌，梁榮志就話因為呢四首歌各自代表60、70、80、90年代。
一向寵粉嘅龍婷喺呢晚都有親近觀眾同大家互動握手，仲有好多熱情歌迷把握機會派利是俾偶像。好識冧歌迷嘅龍婷就話，場館空調好凍，但大家嘅手俾咗好多溫暖佢，所以佢會唱好多好歌回饋大家。
龍婷喺演唱會唱盡天王巨星的經典，大家都對佢嘅表現讚不絕口。龍婷喺鳴謝環節中亦多謝公司喺佢事業路上嘅大力支持，最後以一曲《好歌獻給你》為首晚演出畫上句號。
