鄭伊健 澳門舉行嘅音樂會上周末落幕，呢次伊健帶住小師妹 黃淑蔓 仲有好拍檔 陳光榮 嘅音樂團隊一齊過大海。音樂會以伊健嘅電影歌重新編曲，全新歌單令人耳目一新。
Feanna更為伊健準備小驚喜，原定唱《戀愛預告》突然變成《動地驚天愛戀過》。為製造今次驚喜，一個月前Feanna同樂手就瞞住伊健偷偷綵排。當伊健喺台上聽到突然轉歌都呆咗一呆，但好快就回神繼續揮手打拍子。見慣大場面嘅佢處變不驚，令Feanna同經理人林珊珊喺事後都問伊健點解可以咁冷靜？
伊健就話：「其實我太集中做嘢，反應唔切。我原本諗住唱完《一對對》，承接浪漫氣氛同埋觀眾手機燈，畀佢唱《戀愛預告》，點知佢轉咗歌，Suddenly！做乜改歌唔話我知？不過真係好好聽，好用心演繹，證明大家都好樂意參與呢次演出，花心思喺表演上。」
伊健形容今次係「歌友會」，而唔係傳統形式演唱會，所以喺台上都好似開籠雀咁同大家傾偈，希望同歌迷親近一啲。而台下觀眾反應亦非常熱情，伊健唱到《一起衝一起闖》就湧到舞台前爭相與伊健握手，又送上手幅為佢打氣。
伊健連續唱跳《興波作浪》、《友情歲月》同《極速》等多首快歌，佢都話：「都幾激架，主要係體能問題，一連串又唱又跳晒都幾甘，究竟我體能仲做唔做到呢？但我又好想做，因為我覺得呢個係熱情。我好想大家睇到呢個表演感受到熱情，然後將呢份感覺帶返屋企。」去到音樂會尾聲，伊健誤將《TOGETHER》講成《至少還有我》，提早揭曉壓軸歌，令佢都笑自己係：「年紀大機器壞」
對於有傳將會喺日本開騷嘅消息，伊健承認有好多諗法但未落實，說：「好多憧憬、好多諗法，我依家成熟咗，未做好件事就唔講住。嚟緊呢幾個月辛苦陳光榮，要諗吓點樣做一個不一樣嘅演唱會。有睇開我哋做嘅演唱會都知，無論去邊個地方表演，我哋都會有啲唔同。」