孫燕姿 一連兩場高雄演唱會圓滿落幕，呢次唔只係燕姿相隔11年再喺台灣開Show，更係佢出道25年來第一次喺高雄巨蛋開Show。燕姿指高雄對自己而言充滿回憶，因為初出道時就曾喺高雄做過大大小小宣傳，就連自己奪得金曲獎「最佳新人獎」以及「最佳女歌手獎」都係喺高雄發生。
咁耐冇同台灣歌迷見面，燕姿亦相當識做，喺演唱會點歌環節揀咗唔少幸運歌迷點歌，仲有小朋友著住同佢一樣嘅歌衫，氹得燕姿好開心。其中一位幸運歌迷被點中時，興奮大叫要點《雨還是不停地落下》，因為高雄已經連續落咗兩星期雨，令全場大笑。不過燕姿就話，唔應該係繼續落雨，而係「雨停了，很好。」而唱出《很好》，令大家都好開心。
