由成龍、梁家輝兩大影帝主演，改編自游乃海自編自導港產片《跟蹤》嘅新戲《捕風追影》9月中就會於香港上映。電影以獨特犯罪偵破視角切入，聚焦警匪「追蹤與反追蹤」嘅交鋒。此沙、文俊輝同林秋楠等年輕實力派演員打到飛起，展現新一代武打演員嘅非凡魅力。
成龍同梁家輝自電影《神話》後，今次係相隔廿年再次合作，梁家輝喺新戲中展現前所未見嘅身手，同成龍合演激烈對打戲，成龍仲話，家輝領悟力高，成家班現場教招，都可以即刻領略到，家輝哥仲好興奮話今次係：「演藝生命中最大獎勵！」
而喺一場緊張刺激嘅對打戲中，家輝需要用刀刺向成龍，當家輝哥見到工作人員準備嘅係真刀時都嚇咗一跳，而成龍就氣定神閒，埋位時更不斷叫家輝放鬆，一叫cut經驗老到嘅家輝都忍唔住話驚到流汗。 除咗將家輝哥重新「打造」成武打演員，成龍更擔起傳承重責，教一眾年青武打男神打得又靚又冇型。
文俊輝仲指自己受成龍作品影響，12歲就開始學習中國傳統武術，更曾榮獲香港國際武術節多個獎項。呢次可以同偶像合作，都令佢話自己夢想成真！心情既擔心又興奮。
