韓流傳奇男團 Super Junior 今年迎嚟出道20周年，並為此展開世界巡迴演唱會，巡演以全體九名成員，包括久未參與巡演活動嘅希澈都會一齊回歸！消息一出，演唱會門票搶購一空，而為照顧撲唔到票嘅粉絲，SJ特別安排全球各地戲院，同步直播喺首爾舉行嘅第一場20周年演唱會，但戲院直播門票同樣難搶，喺香港戲院首輪公開發售一推出即全部售罄，為咗唔好令粉絲失望更有兩度加推，就係想大家可以感受SJ嘅舞台魅力。
Super Junior喺音樂屆嘅表現及貢獻一向備受認同，2017年嘅首屆亞洲明星盛典獲頒「傳奇獎」（Legend）！而SJ成員攜手走過風風雨雨，兄弟感情其實非常好，大家都努力地維繫團隊。始源曾經喺綜藝節目中感性表示，假如冇隊長利特，講唔定Super Junior一早就散。成員們經常互相支持扶持，年初銀赫推出SOLO歌曲《UP N DOWN》時仲話：「如果拿到第一名就退休」，豈料旋即於每周嘅「音樂銀行」奪冠，東海同始源當日都有到現場為佢打氣，厲旭更連發了兩則限時動態祝賀銀赫！
