由吳若希、火火、GM曾展望、賴慰玲主持嘅TVBPlus直播節目《奇情谷》日前播出最後一集，搵嚟因為苦追女神 梁敏巧 而爆紅嘅網絡紅人 Baby Face 做嘉賓。Baby Face帶埋現任KOL女朋友Nina上嚟分享兩人嘅愛情故事。
Nina話一開始自己係Baby Face嘅小助手，Baby Face喺戀愛綜藝《女神配對計劃》失敗後，一度情緒失落，Nina亦有為對方開解，二人就此擦出愛火花。Nina讚男友廚藝了得，自己都有食過對方整嘅腸粉。
立即重溫《奇情谷》精彩內容
節目設網上討論區令觀眾可以向嘉賓提問，有網民問Baby Face過往情史，佢就話自己拍過最長嘅拖係三年，面對女士要多包容、多體諒。亦有人提問Baby Face點分自信同自大，佢就話自信係欣賞自己一啲地方，會光明正大企出嚟，自大就係經常空口說白話。
Baby Face參加《女神配對計劃》向Maggie示愛被拒，亦正式為呢場單戀劃上句號，咁啱呢晚佢同Nina喺電視城化妝間撞到Maggie，三人更一齊合照，Baby Face同Maggie亦有傾偈互送祝福。
節目做咗幾個月，眾多主持從未合作過到超級熟絡，加上因為呢個節目見識到唔少奇情經歷，GM就話最難忘其中一集幫手尋人，賴慰玲就難忘尾二集探討雙性人話題，更同一位雙性人嘉賓討論。咁多位主持都好希望節目有得添食，不過話要靠曬觀眾喇！
