謝霆鋒相隔25年再開騷，今年4月舉行四場啟德主場館個唱，掀起「鋒潮」席捲內地，霆鋒目前忙於內地巡迴，今個月初完成杭州站，佢喺9月20號將喺廣州開騷，除咗努力籌備演唱會外，佢仲抽時間去睇G.E.M.鄧紫棋嘅啟德騷，心情似乎就未受王晶近日嘅爆料影響。
霆鋒與張柏芝喺2006年結婚，婚後生咗Lucas及Quintus，二人於2011年離婚，分開多年，霆鋒與柏芝離婚後從未公開互相詆毀，並共同扶養小朋友，而柏芝喺2018年秘密生咗孻仔張禮承（Marcus）。由於近排掀起「鋒潮」，加上柏芝近年主力喺內地發展，再次惹起網民好奇二人離婚原因，眾說紛紜，王晶近日喺網上節目談及此事，爆霆鋒與柏芝當年離婚內幕。
王晶喺近期一集談及霆鋒同柏芝離婚真相，指霆鋒與柏芝邂逅相戀係拍《老夫子》嗰陣，王晶話柏芝好鍾意霆鋒，霆鋒手指受傷，柏芝喺夜晚趁霆鋒瞓著幫其搽藥膏，後嚟霆鋒向柏芝求婚，不過王晶稱二人愛情始終敵唔過雙方性格與溝通方式嘅差異。
王晶記得當年拍《無價之寶》時，霆鋒與柏芝仍未離婚，柏芝母愛泛濫煮嘢食畀在場嘅童星，但柏芝一邊煮一邊鬧霆鋒，王晶感覺柏芝有好多不滿，估計呢段婚姻好難維持，果然冇幾耐就離婚。王晶認為主因係性格不合，但係兩人互相嘅吸引力，令佢哋覺得可以解決呢個問題，王晶澄清霆鋒與柏芝離婚，跟「閃卡」事件或「飛機合照」等傳聞無關。
