前藝人吳美珩曾經係90年代TVB當家花旦，佢喺劇集《楚漢驕雄》飾演嘅虞姬一角至今仍然令人難忘。但喺2001年吳美珩同富商老公拉埋天窗後，佢就淡出幕前，專心相夫教子，甚少再有公開露面。
日前鄭裕玲喺社交平台分享兩張為宣萱及顧紀筠慶生嘅聚會相，當中仲有劉曉彤、丘凱敏同吳美珩。雖然吳美珩已經係一對仔女嘅媽咪，不過凍齡力驚人，外表未有太多歲月痕跡，仍然有初出道時嘅古典美人氣質，完全係美魔女一名！呢次可以湊齊人食飯，都令Do姐特別開心，喺配文寫：「苦等兩年半，終於可以齊集六美聚首！可以想像我們有多高興、多愉悅！祝大家生日快樂，身體健康！」
唔少網民都大讚吳美珩Keep得好，仲話「虞姬果然係虞姬」、「all timeless beauties… 吳美珩… pretty as always…」、「吳美珩同丘凱敏仲係好靚好靚」，亦有人為9月生日嘅Do姐提前送上生日祝福。
