由許光漢、袁澧林主演，金馬影后張艾嘉監製、龔兆平執導嘅奇幻愛情電影《他年她日》即將喺10月初上映，並於8月底喺香港舉行亞州記者會。張艾嘉唔只做監製，更擔任編劇身份同導演耗時一年幾打磨劇本，將奇幻元素同深刻愛情融合，創造出扣人心弦嘅故事。
電影探討時間同愛情嘅本質，兩位主角生活喺兩個唔同嘅世界「優日區」、「長年區」，而「時間」喺兩個世界係截然不同；喺「優日區」嘅一日，係「長年區」嘅一年。
為令觀眾感受到兩個地方嘅不同之處，香港嘅獨特城市風貌為故事提供完美舞台。張艾嘉表示，團隊必須要談論好多角色背景、生活方式，先可以造出當前場景。而製作及藝術總監文念中透露，「優日區」係一個科技城市，團隊覺得呢個城市應該要有一種冷漠感，呢種鋼根水泥嘅建築風格非常適合，都係黑、白、灰。後嚟諗到香港最新建築M+。
至於許光漢喺戲中所身處嘅「長年區」，主要背景為工業用途，亦有大自然嘅明媚風光。光漢坦言：「這一部很多場景跟很多戲，都會讓我覺得好像真實發生。」而導演龔兆平透露，由於「長年區」設定係一個工業世界，但是喺香港非常難搵，最後執行製片搵到一個油庫，於是就喺青衣油庫一帶誕生出「長年區」。
張艾嘉更為場景張羅，為劇組成功爭取成為另一個重要場景：田灣下水道。呢個地方從未被批准過拍過電影，經過2個幾月協商先可成功爭取。導演話，呢個場景可以被自然光穿入，同時又好隱蔽，有工業城市味道，第一次睇景就感受到有溫度嘅生命力，完全符合男女主角感情滋生嘅氣氛。女主角袁澧林亦形容呢個場景同自己想象嘅「長年區」一樣，好有韻味。
