《2025香港小姐競選》14位候選佳麗經過近一個月嘅特訓，全員狀態大勇迎接31號嘅決賽。佳麗們呢日現身活動，分組比拼接受考驗，各人被分配一段電影對白，要邊演技邊展腕錶。一眾佳麗瞬間入戲零怯場，其中 9號陳詠詩 仲演到眼泛淚光。
陳詠詩解釋，因為覺得自己所講嘅對白「無論明天發生什麼，我們至少擁有今天，我們會永遠記住這一天。」好似形容呢段港姐之旅，因為距離8月31日嘅決賽越近，自己都要享受淨返嘅時光。6號朱文慧 就表示，大家每日都為決賽努力綵排，自己都想努力珍惜每一日。8號岳凡荻 就話要休息多啲，先有好嘅精神狀態面對。至於 7號施宇琪 表示除咗減肥，自己都要喺綵排時抱住「試當真」態度企到台上，輸贏都各有各好，自己都放心去做。
由 11號梁倩萱 、 12號庄靜璟 、 13號袁文靜 、14號何詠多 組成嘅隊伍，最後獲得「最佳演繹獎」，雖然 梁倩萱 被安排嘅對白好短，但係佢都好多謝隊友嘅努力。庄靜璟 以唱歌嘅方式表演，何詠多 就自認鍾意演戲，所以好開心有呢個表演機會。袁文靜 要講嘅對白唔算短，佢亦下咗苦功記台詞，仲話想做得嚴肅一啲反映電影場景。
《2025香港小姐競選》14位候選佳麗名單：
1號李尹嫣、2號甘詠寧、3號蔡華英、4號莫凡、5號曾閱遙、6號朱文慧、7號施宇琪、8號岳凡荻、9號陳詠詩、10號文雅儀、11號梁倩萱、12號庄靜璟、13號袁文靜、14號何詠多
