TVB同騰訊視頻合拍嘅重頭劇《玫瑰戰爭》由舊年底釋出開拍消息後，劇中主演誰屬一直令人期待，最近角色人選終於有定案，除咗三位視帝陳豪（Moses）、馬國明（Kenneth）、陳展鵬（Ruco）加入之外，仲有楊茜堯（Tavia）同林夏薇（Rosina）強勢加盟做女主角，聽到兩位嘅名字，不禁令人回想佢哋喺《黑色月光》仇人見面，分外眼紅。
《玫瑰戰爭》由總監製鍾澍佳打造，故事講述四大女星捲入殺人嫌疑案，內容曲折離奇，掀起一場女星風波，耐人尋味嘅情節相當吸引。之前釋出嘅資料中，仲有姚子羚（Elaine）、陳自瑤（Yoyo）、傅嘉莉（Kelly）、鄺潔楹等參與，如今再有多位視帝后加盟，令觀眾敲碗以待，而劇組即將喺深圳舉行開機儀式。
今次亦係茜堯同薇薇喺《黑色月光》後再度聯手，薇薇大約一星期喺社交平台上載自己坐喺飛機上睇劇本畫面，自揭加入劇組消息，並指長途機係做功課嘅好時機，你好，《玫瑰戰爭》。因為薇薇之前難得放假，於是去咗個旅遊叉足電，之後就閉關進入角色。而薇薇同陳展鵬多次合作，早前喺內地開騷誠邀對方做嘉賓，以螢幕情侶姿態現身合唱。
茜堯之前喺《黑色月光》首度同佳導合作，結果擦出不一樣火花帶畀觀眾驚喜，劇集播出時收視口碑熱度好高，作品大獲好評，同劇組合作好開心，余滿月角色更令茜堯獲頒《大灣區我最喜愛TVB女主角》。之前一直有傳茜堯對《玫瑰戰爭》角色感興趣，三人終於再度合作，加上茜堯、馬國明及陳豪亦曾合作劇集，眾人埋位必定默契十足。
