內地人氣男星許凱喺劇集《延禧攻略》對吳謹言飾演嘅魏瓔珞情深款款，傅恆角色成功塑造出痴情男形象，加上劇集在港播出時大受歡迎，令觀眾留下深刻印象，近日《延》劇亦係J2重播，許凱因爆出醜聞被內地傳媒廣泛報道。
事緣內地女星許荔莎同許凱近日傳出緋聞，事件卻有新發展。許荔莎喺微博發文驚爆2022年男方與同公司女星趙晴開房而導致分手，又逐一還原時間線導出與許凱相識經過，力數對方劈腿經過。
許荔莎指同許凱相識於2021年一個藝人生日會聚會上，翌日應某個劇組邀請聚會，一班人去許凱屋企，當晚許凱曾要求佢遲啲先走，之後喺醉意下將許荔莎拉到門邊親吻，許凱更脫下衣服，令許荔莎當堂嚇倒，趁許凱喝醉趁機離開。許荔莎聲稱許凱不斷聯絡，並為失態作出解釋及送禮，及後兩人開始交往，喺2022年1月因吵鬧分開，8月喺橫店拍戲重修舊好，直至同年底，因許荔莎拍劇回重慶家居隔離，佢同許凱一個月沒法見面。新年過後許凱則喺青島入劇組，許荔莎指許凱一直忙住劈腿，三番四次約會其他女生，試過由朋友掩護下跟女性去酒店開房。
許荔莎於2023年4月忍無可忍刪除許凱聯絡，同年10月許凱再次添加許荔莎微信，試圖為自己所作所為解釋，更觸發許荔莎情緒，將內容轉告許凱經理人，反被許凱大罵黑寡婦，許荔莎一直啞忍兩年，最終決定撕破其真面目。
許荔莎不斷喺網上爆料，令事件瞬間被炒熱，打擊許凱嘅情深形象，適逢近日許凱有份主演劇集《子夜歸》開播，由於此事持續發酵，老闆于正隨即發聲明指已取證，準備報警同提告誹謗。許荔莎則透過微博回應：「于正老師，總不能因為我談戀愛被綠被罵而報警抓我吧。」
許凱經理人公司亦發聲明指「許凱目前單身，所有關於非單身或出軌的說法皆屬虛構」，並直指網路流傳嘅對話紀錄有偽造成份，相關證據已交警方處理，並保留法律追訴權利。另一方面被爆開房女主角趙晴都透過經理人公司發聲明，否認任何不當行為。
