麥美恩Mayanne早前成為追星天花板，成功飛去曼谷訪問泰劇女神鄺玲玲同Orm，仲有幸去到兩人所屬嘅電視台，Mayanne獲守候嘅粉絲們投以超級羨慕嘅目光。
Mayanne見到玲玲同Orm時，三人先一同以泰文同觀眾打招呼。Mayanne解釋好多同事都知佢有關注開玲玲同Orm嘅消息，點知有日公司真係話會播佢哋嘅泰劇，仲話想睇吓有冇機會視像訪問，於是Mayanne膽粗粗提議直頭飛去曼谷搵佢哋，點知公司真係批准咗，令Mayanne夢想成真好興奮。
登入myTV Super追看《唯有你》
Ling Orm CP再度合作嘅新劇《Only You》喺 myTV SUPER播出，劇中玲玲會化身型爆保鑣保護Orm飾演嘅Super star，所以玲玲拍攝時打到七彩好多動作戲，仲搞到周身瘀傷，但佢一啲都唔覺得辛苦，反而覺得呢個前所未有嘅挑戰好好玩，相反Orm就唔使點打，受到玲玲嘅保護好溫暖，兩人戲內戲外都好好感情。
Mayanne除咗訪問兩人關於劇集嘅問題，當然仲有真Fans想知道嘅事情啦，好似Orm同媽媽兩母女嘅特別關係，以及玲玲會親揭自身同香港秀茂坪嘅關係，想知箇中精彩內容就要留意後續。