谷婭溦、周吉佩、羅啟豪、譚輝智及黃劍文喺本月30號聯合開騷，呢日佢哋同《中年好聲音》音樂監製Donald一齊合體綵排，今次溦溦喺呢個騷要先後同四大猛男合唱，又要按歌曲投入唔同嘅感情，體力同精神上都相當費力，吉吉就大爆之前同溦溦綵排時，竟然唔小心有心動嘅感覺。
吉吉由於二人要望實對唱，有一刻個心出現小鹿亂撞嘅感覺，吉吉覺得喺唱歌上係要有呢種感覺，自己都期待喺舞台上對住唱，溦溦都認同嗰首歌係要由好濃烈嘅感覺去傳遞畀觀眾，更爆吉吉已提早報備，吉吉笑指獲太太首肯，自己係安全嘅！
輝智認同吉吉講對住溦溦有心動感覺，不過自己就唔敢望，怕一望就入咗，更笑指啱啱向太太入咗紙，獲太太發出臨時許可證。
單身嘅劍文就唔怕另一半呷醋，反而擔心自己音準，佢唔小心揀咗首好難唱嘅合唱歌，要好辛苦去練和音，劍文又透露手傷已康復，到時可以同吉吉Jam歌。羅啟豪感謝監製Donald幫佢哋重新編曲，Donald更預告《月半小夜曲》有特別火花！
