金牌監製 劉家豪 同 梅小青 夫婦，趁住暑假尾聲搞party同一班朋友聚會，仲準備咗四個蛋糕，祝賀四組朋友嘅唔同喜事，當中包括幫8月23號生日嘅 尹光 慶祝81歲生日，以及恭喜 方力申 喺世界先進游泳錦標賽勇奪三面金牌。
小青姐話自己為蛋糕上嘅賀詞費盡心思，好似當年改劇本一樣改完又改，仲搞笑話自己監製上身，不過小青姐嘅賀詞又的確好用心，好似祝賀光哥「尹博士生辰，精叻威過人」；祝賀小方就係「喜事陸續到，人生勝利組」。
張頴康同麥雅緻夫婦亦係座上客，見小方好威水咁帶晒三塊金牌來同大家逐一介紹，Angie亦大讚小方「一次拿到三塊世錦賽金牌，真係好勁呀！」。不過小方嘅太太Maple就未有陪老公出席。眾人仲為尹光齊唱生日歌，氣氛溫馨熱鬧。
